E SCIACQUANTE ...

E SCIACQUANTE.
___________________________________

'A cumpagnia è cchella 'e tutte 'e ssere:
na dicina 'e sciacquante assaie speciale.

... Gente abbasata ca trova piacere
a farse chini chino 'o vernecale*.

Comme mettono 'o pede int' 'o lucale,
vide ca tutte quante 'e cammariere
se fanno a qquatto: stènneno 'o mesale,
portano 'e ssegge, allùstrano 'e bicchiere...

'A pusteggia s'arrocchia pe' sunà.
Mentre 'o trattore, ca s' 'e ttene mente,
se fa nnanze dicenno: - Eccome qua!

Pe' vvuie tengo int' 'o furno na lasagna.
Ve faccio arrecrià. Ma pe' ttramente
veviteve st'asprinia... è na sciampagna.

(Egidio Zito)

'E SCIACQUANTE' - Nel senso di freguentatori di osterie.
'Vernecale' - La pancia.
___________________________________